Buat hotu akontese tuir Na'i nia hakarak. Maromak mak moris nia abut no domin nia hun. Ema nia moris soi iha Maromak nia mahon. Nia mak hu'u iss no haraik espiritu ba ema idaidak.
 |
| Auina Joana (foto: Jano) |
Ida ne'e mak Joana dos Santos, feto faluk ida, ne'ebe serbisu maka'as, hikis kosar-ben hodi fo han no hatais, fo eskola no hanorin nia oan mane nain hitu. Joao Martins, nia laen barlaqueadu, mate hela nia ho oan hitu iha tinan 1980 liu ba. Tinan sanulu resin tolu moris hanesan faluk ho difikuldade no susar oi-oin, maibe ho domin boot konsege ultrapasa prolema barak no loke dalan ba nia oan sira, dudu nia oan sira ba mundu edukasaun no prepara hela sira nia futuru.
Nu'udar inan ida, Joana halo duni nia obrigasaun maske situasaun moris no kondisaun ekonomia iha tempu ne'eba iha faze kritiku. Moris iha foho, ai-sunu no bee-moos dook, ai-han sira depende ba rezultadu husi kintal no to'os. Hanesan feto, tenki halo serbisu feto nian, maibe iha tempu hanesan tenki halo mos serbisu mane nian. Hau imajina la hetan, la hatene nia hetan forsa husi ne'ebe maibe hau hatene deit katak ho domin mos no dedikasaun ba oan sira mak forsa boot ba nia hodi ultrapasa difikuldade sira ne'ebe boot no imposible atu hetan solusaun.
Hau nia tempu hamutuk ho inan doben durante tinan sanulu resin haat, maibe hau nia domin hela ba rohan laek, metin nafatin iha hau fuan hanesan mos domin ne'ebe hau simu husi nia. Hau sei lembra memoria barak ne'ebe furak, midar no mos moruk durante tempu ida ne'e. Hanoin iha to'os laran; kuda rai, hamoos batar duut, silu batar, lalin batar, ku'u modo, ke'e forerai. Iha kintal uma nian; sei lembra nia badinas kuda fehuk midar, ai-farina, hamoos du'ut iha kintal, ku'u malus no buat seluk tan. Iha natar; sei lembra hamoos duut iha natar laran, hein no duni manu-lin, koa hare, sama hare, tula hare iha trator boot, halo rituais sira iha natar laran nian, tempu ruma mos ke'e maek iha ai kakeu laran, ku'u ai-manas, nune'e mos tempu seluk ba kaer boek, kaer ikan, tuna no buat seluk tan. Dala ruma mos hau hanoin hetan ba faan manu iha merkadu, faan fahi ka bibi oan rumu. Tempu seluk hanoin hetan fo han fahi, kesi bibi, sulan karau, tula manu ba ai sira. Dala ruma mos hau hanoin nia tuku batar, fai batar ka hare, daan batar ka tein etu kahur ho batar tukun, tunu batar nurak iha toos laran. Loron ida, baihira nia fila husi toos lori batar bote boot rua no hau sei sa'e tan ba bote ida nia laran.
 |
| Auama Joao (foto: Jano) |
Memoria hakerek lahotu maibe hela metin iha diariu moris nian. Iha tempu balun, hau hanoin kona halo viajen hamutuk, ba buka koto-moruk iha ai-laran, ku'u goiabas tasak no ai-fuan sira seluk, ke'e kumbili, sinkumas iha fatin-fatin foho leten nian. Nune'e mos hanoi hikas hakur mota, sa'e foho lolon, liu husi duut matak, husi ne'e hau aprende buat barak kona-ba moris nia lalaok, nia hanorin ho asaun iha aktividade moris loron-loron.
Tinan rua nulu (20 anos) liu ona, nia mate tiha ona, maibe memoria hirak ne'e hela metin ba istoria moris nian, kesi metin iha domin entre inan ho oan, no mate sei lahakotu domin ne'e. Joana dos Santos, hatene lolos saida mak domin, tanba ne'e nia hadomi nia oan sira ho domin lolos nian, domin ida ne'ebe nia hun iha Kristu, domin Maromak nian.
1993 - 11 Outubru - 2013, Auina nia loron mate, isin mak mate, klamar sei moris nafatin no domin sei buras nafatin. Ami, oan sira nia orasaun, hanoin no domin sei hamutuk nafatin ho auina, inan ne'ebe ami hadomi. Ami fiar katak iha mundu seluk ne'eba, auina sei hetan fatin diak, naroman no dame hamutuk ho Anjo no Santo sira ba rohan laek.
Dili, 11 Outubru 2013