Simu Osan Pensaun ka Lia Menon Tolu?

Empregadu ida servisu ona durante tinan 20. Nia idade tama ona ba tempu reforma nian. Iha loron ikus servisu nian, empregadu ne’e ba hasoru nia patraun dada lia ba dala ikus. 

Patraun: “ita boot servisu ona durante tinan 20 ho di’ak tebes iha kompaña ida ne’e. Agora, hau fó opsaun ba ita boot atu hili entre buat rua; ida uluk mak ‘osan pensaun durante tinan 20 nian’, no ida seluk mak ‘lia menon tolu’ husi hau.”

Empregadu ne’e hakruuk hodi hanoin, no ikus mai nia deside hili de’it ‘lia menon tolu’ husi nia patraun. Nia patraun hato’o lia menon nune’e:

Lia menon dahuluk “labele no nunka hakarak atu foti dalan korta nian, laiha buat fasil no gratuitu iha mundu ne’e, halo buat ruma karik tuir etapa husi ida ba ida seluk ho konfiansa”.

Lia menon daruak “se rona buat ruma ladi’ak, lalika kuriozu atu buka hatene, tanba ida ne’e bele hamate ita boot.”

Lia menon datoluk “labele foti asaun ruma bainhira emosaun domina hela ita boot, tanba arepende ikus folin laek.”

Depoisde dada lia ikus ne’e, patraun fó osan uitoan no paun fuan tolu ba empregadu ne’e hodi hatete “paun ida boot liu lori to’o ba uma han hamutuk ho família sira!”

Empregadu ne’e fila duni ba nia knua moris fatin. Nia la’o to’o ba kruzamentu ida no lahatene liu husi ida ne’ebé bele to’o ba nia uma. Nia husu ba ema sira besik iha ne’eba, no hetan esplikasaun katak “dalan ida ki’ik ne’e besik liu” no “dalan ida boot seguru liu.”

Tanba empregadu ne’e hakarak to’o lalais ba uma, nia hili dala ida ki’ik. To’o dalan klaran, nia hasoru ema halai fila no hatete katak dalan ne’e naokten barak. Nia hanoin hetan patraun nia lia menon dahuluk. Nia fila fali la’o tuir dalan boot. Tanba hamlaha ona, nia mós hasai paun ida hodi han netik. 

Loron monu ona ba tasi, rai kalan dadaun, uma sei dook tebes. Nia deside toba iha uma bainaka ‘guest house’ ida. Iha kalan boot, nia rona feto ida tanis maka’as, maibe tanba nia hanoin patraun nia lia menon, nia laiha kuriozu atu sai ba buka hatene. Nia han tan paun fuan ida no toba. Iha dader, bainhira nia hader sai ba liur, ema hotu hakfodak no dehan “ita boot sei moris hela ka? Hodi kalan feto bulak ida mai tanis bosok dada bainaka sira sai, no nia oho hotu sira. Agradese tebes, ita boot sei moris hela.”

Loron ne’e nia kontinua la’o ba uma. Nia to’o ba uma rai kalan ona. Nia hakarak tebes halo surpreza boot ida ba nia fen, tinan 20 ona lahasoru malu. Nia tama direita ba sira nia kuartu. Maibe, nia hakfodak tebes tanba nia fen toba hela ho mane ida. Sira na’in rua toba dukur loos ona. Empregadu ne’e fuan atu nakfera, ran nakali sae ulun, isin hotu nakdedar. Nia foti katana boot ida atu oho tiha mane ne’e, maibe nia hanoin hetan patraun nia lia menon datoluk. Nia hatun tensaun no sai ba toba de’it iha liur. 

Bainhira rai hun mutin, nia fen hader no hare hetan nia laen toba hela iha liur. Nia haksolok tebes, no tama fali ba kuartu laran “Ameta, Ameta, hader ona, hader sai ba liur, O nia pai mai tiha ona.” Nia pai mós hakfodak tebes, tanba mane ne’ebé toba hela ho nia fen ne’e, nia oan mane rasik, mane boot ona. 

Tuir mai, nia fen konta katak “bainhira O atu sai ba buka servisu iha sidade, hau isin rua tiha ona. Durante ne’e, hau tenta buka kontaktu ba maibe lahetan resposta.” Empregadu ne’e hakuak metin nia oan mane no fen. Nia agradese, sorte nia hanoin hetan lia menon patraun nian hori kalan, lae karik oan mane kala mate tiha ona, hela naran de'it. 

Empregadu hanoin hetan paun boot ne'ebé nia lori to'o uma. Nia hasai paun boot ne’e atu halo ba matabisu, maibe nia hakfodak tebes, tanba bainhira nia loke paun ne'e, iha paun boot ne’e laran, ense nakonu ho nia osan pensaun tinan 20 nian. ksolok tebes!

mensajen morál "KUIDADU DIDI’AK MOLOK FOTI DESIZAUN RUMA!"

Kapasidade Interpretasaun nia Impaktu ba Moris

Aman di’ak ida, besik ona hakotu nia iis. Iha fen kaben nia oin, nia fó hela lia menon ikus ba nia oan mane na’in rua: 

Lia menon dahuluk: “Labele husu fila fali buat ne'ebé imi fó impresta ona ba ema” 

Lia menon daruak: “ Bainhira ba ka fila husi loza, loro-matan labele kona imi nia oin” 

Liu tiha tinan barak depoisde aman ne’e mate, faktu hatudu katak oan dahuluk sai ema riku bo’ot maibe oan daruak (ikun) sai ki’ak rabat rai. 

Loron ida, inan bolu oan ikun hodi husu tuir, "nusa mak sai hanesan ne’e oan"

Oan ikun hatete:

“Mae, hau nia moris sai nune’e tanba hau halo tuir lia-menon pai nian. Pai hameno atu hau labele husu fila fali saida mak hau fó impresta ona ba ema. Tan ne’e hau nia kapitál menus ba bebeik. Ema laselu fila saida mak sira foti husi hau no hau labele husu ba sira”. “ Pai mós hameno, karik hau ba ka fila husi loza, keta halo loro-matan kona hau nia oin. Tanba ne’e hau ba mai sa’e taxi de'it atu loron lakona hau. Tuir loos, hau bele la’o de’it maibe tanba pai hatete nune’e, hau halo tuir, hau nia osan sai hotu ba taxi.”

Loron seluk, inan bolu oan dahuluk hodi husu tuir, tansá nia sai riku tan de’it:

Oan dahuluk nia resposta:

“Buat sira ne’e hotu tanba hau halo tuir pai nia lia menon. Pai hameno katak labele husu fila-fali saida mak fó impresta ona ba ema. Nune'e, hau deside lafó impresta ba ema. Tan ne'e, hau nia kapitál lasai arbiru.” “Pai mós hameno katak ba ka fila husi loza labele halo loro-matan kona oin. Tanba ne’e, hau sai husi uma ba loza molok loro-matan sa’e, loke hau nia loza molok ema hotu loke sira nian. Nune’e mós hau fila husi loza ba uma depoisde loro-matan monu ba tasi, taka hau nia loza depoisde ema hotu nian taka tiha ona.”

Oan ne'e dehan tan: “Ema hotu hatene hau nia loza. Loza ne'e sai boot tanba iha oras serbisu barak liu” 

Mensajen morál: “halo ba buat ne’ebé baibain ho esforsu ne’ebé la’os baibain”

traduz tinan rua liuba husi www.moralstories.org

La'os Mane Baibain - Lenda Nova Zelandia nian

MAUI – LA’OS MANE BAIBAIN IDA

Maui hanesan prezente ida, matenek boot mitolojia Polinésia nian ne’ebé responsável kail-ikan to’o ba Illa Norte rai Aotearoa, Noza Zelandia.

Depoisde milagrozu naximentu no formasaun, Maui manán kariñu husi nia parenti supranaturál, hanorin arte util ba umanidade, lasu loro-matan no halo maus ahi. Maibe, nia hahalok kmanek famozu ida mak kail-ikan to’o ba Illa Norte.

KAIL HETAN ILLA IDA

Despreza tiha nia, Maui nia maun-alin nain haat konspira atu husik hela nia bainhira sira la’o sai ba kail-ikan. Maui rona hela sira nia planu, ho subasubar nia halo kail ida husi ruin-maxilar májiku bei’ala nian. Tuir mai iha kalan ne’eba nia dolar tama ba maun-alin sira nia bero no subar iha kabelak-okos.

Nia maun-alin sira lahatene to’o tama dook ona ba tasi laran, bainhira sira kaer ikan hatama ba bero laran, Maui hatudu nia-an sai husi kabelak okos. Nune’e, nia hasai nia kail májiku, hananu horok makberan no soe dadauk kail ba tasi laran besik bero ninin.

Kail ne’e tama klean no klean liután ba tasi laran to’o Maui sente kail kona buat ida. Nia dada neineik no husi dook kail ne’e kaer metin. Hakail hetan ikan boot ida! Hamutuk ho nia maun-alin sira, Maui dada ikan ne’e to’o ba superfísie (bee leten/kabelak bero nian).

Maui fó sentidu ba nia maun-alin sira atu hein to’o nia hadame ona Tangaroa, rai na’in tasi nian molok sira ko’a fahe ikan ne’e. Maibe, sira sente kole ona hein no hahú ko’a fahe dadaun ona ikan ne’e. Ida ne’e mak agora sai tiha foho le’et, foho lolon, lagoa no fatuk litorál sira iha Illa Norte.

MAUI NIA IKAN – TE IKA A MAUI

To’o ohin loron, Illa Norte koñesidu ba rai na’in Maori sira ho naran Te Ika a Maui ka Maui nia ikan. Bele nota iha mapa Nova Zelandia nian, haree ikan ulun iha sul no nia ikun iha norte. Illa Norte mós koñesidu ho naran Te Waka a Maui ka Maui nia bero, no Illa Stewart ka Rakiura koñesidu ho naran Te Punga a Maui ka Maui nia bei’ala nia fatuk.

Traduz husi www.newzealand.com
Photo mapa foti husi backpack NZ

Volume Emigrasaun Internasionál Kontinua Sa'e Maka'as

Emigrasaun internál no internasionál bele sai forsa positivu ba dezenvolvimentu sosiál no ekonómiku.

Sira oferese mekanizmu atu rebalansu merkadu trabllu nian iha nasaun orijen no destinasaun. Sira mós bele aselera difusaun teknolojia no idea foun sira.

Emigrasaun mós bele rezulta signifikante tebes kona-ba hatama osan ba nasaun orijen.

Baibain, emigrasaun internasionál mak komponente kiik husi mudansa populasaun kompara hó sira ne’ebé moris ka mate.

Maske nune’e, impaktu husi emigrasaun iha númeru populasaun bele signifikante tebes iha nasaun sira ne’ebé haruka ka simu ema barak husi emigrante ekonómiku nian.

Entre tinan 2015 no 2050, númeru emigrasaun projeta sei sa’e to’o pursentu 82 husi kreximentu populasaun iha nasaun sira hó altu-rendimentu.

Nune’e mós projeta katak nasaun hirak ne’ebé sei simu emigrante internsionál sira barak liu mak hanesan Estadus Unidus, Kanadá, Reinu Unidu, Australia, Alemaña, Federasaun Rúsia no Itália.

Timor oan rihun mak muda ona ba hela metin iha rai Reinu Unidu no nasaun Europea sira seluk, barak iha Australia no nasaun seluk tan. Sira bele benefisia Timor-Leste liuhusi hatama osan ba família sira iha rai laran.

____

Populasaun iha mundu agora dadaun sura hamutuk biliaun 7.3, no sei sa’e ba númeru billiaun 9 iha tinan 2050, no iha tinan 2100 soma ema iha mundu hamutuk biliaun 11.

Oinsá ita nia preparasaun hasoru kreximentu populasaun ne’ebé sa’e maka’as? Ho populasaun ne’ebé nakonu mundu rekursu natureza hetan konsume barak liután, oinsá proteze ita nia natureza?

Fontes: Nasoins Unidas

Photo foti husi moving people changing places.

Tesi Mohu Ai-Tuan sira, Tesi O nia Futuru

Ita hatene, no la’os buat foun ida katak ema tesi ai iha territóriu tomak. Iha tempu bei-ala sira nian, iha rai Grésia, Itália, no Reinu Unidu ai-tuan laran mak haleu. Liu tiha sékulu ba sékulu, ai-tuan hirak ne’e gradualmente tesi mohu, to’o agora mohu hotu ona, laiha ona ai-tuan laran.Ohin loron, ema tesi mohu ai sira lalais liután. Kada tinan, ai hamutuk iha rai besik ektare miliaun 42 mak tesi mate mohu. Númeru ida ne’e kuaze luan liu area rai Reinu Unidu nian. Loos duni, iha razaun importante barak atu tesi ai-sira, maibe mós iha konsekuénsia perigozu ba moris iha mundu ida ne’e.Kauza majór ba destruisaun ai-tuan sira mak nesesidade iha mundu tomak utiliza ai iha moris loroloron. Iha nasaun industrializadu sira, ejizénsia uza ai barak tebes, hodi halo surat-tahan, mobília, no harii uma. Laiha ona ai barak iha nasaun hirak ne’e atu fó satisfás ba nesesidade populasaun nian. Tanba ne’e, Kompaña Ai sira hahú ba foti ai husi rai Ázia, Áfrika, Amérika Súl, no to’o ba rai Siberia.Iha nasaun ki’ak sira, iha fatin barak tebes, ema sunu-ai hodi tein hahán. Kuandu kreximentu populasaun sa’e maka’as, nesesidade ba ai-sunu mós sa’e maka’as. Maibe, se ai-tuan sira tesi mohu dala ida, ai-laran ne’e destruidu ona. Nune’e, ai-hun sira ba futuru mós destrui hotu. Karik ita husik hela ai-hun balu hamriik metin iha ai-laran, iha esperansa katak sei iha fali ai-laran tuan iha futuru. Maibe, ida ne’e signifika katak labele tesi ai hirak ne’e iha tinan 100 nia laran. Iha realidade, hatudu momoos katak laiha probabilidade atu hamoris hikas ai-laran tuan sira. Toos na’in sira lakon esperansa ba mudansa rai ne’e. Sira tesi mohu ai no sunu motuk hotu, ho dalan ida ne’e, kada tinan ai-tuan sira iha rai ektare miliaun ba miliaun mak hetan destrui hotu. Infelilzmente, rai bokur mós mohu no laiha tan kbiit atu hamoris ai-han sira. Ne’e duni, toos na’in ki’ak oan sira sai ki’ak ba bebeik no laiha esperansa ba moris di’ak liu. Sira halakon hotu ona rekursu iha ai-laran tuan ne’ebé bele fó moris.Maske nune’e, la’os ema toos na’in kiak sira mesak de’it mak tesi mohu ai-tuan no sunu motuk. Iha Brazíl no Amérika Súl, rai na’in ba rai luan sira hakarak hakiak krau barak hodi esporta ba nasaun seluk. Sira sulan krau barak tebes hamutuk iha rai luhan kloot, bainhira rai ne’e dodok hotu ona, sira sunu ai-laran seluk hodi muda krau sira ne’e ba fatin/luhan foun. Ho dalan ida ne’e, sira destrui ai-laran no rai-bokur dala ida.Destruisaun ai-laran tuan afeita dahuluk ba ema sira ne’ebé hela iha ne’eba, maibe mós iha nia impaktu ba tempu naruk. Ezemplu, iha foho sira, ai mak tulun absorve/hemu udan boot/been. Kuandu tesi mohu hotu ai, udan been suli hotu kedas ba mota, mota tun boot no halo rai monu. Ida ne’e akontese ba Mota Ganjes, Mota Mekong, no mota boot sira seluk iha rai Ázia.No ikusliu, lakon ai-laran tuan sira bele afeta ba ita nia klima no planeta. Ho populasaun ne’ebé aumenta signifikante tebes, ida ne’e bele kauza temperatura sa’e no klima mós muda iha mundu tomak. Laiha ema ida mak hatene loloos afeta saida mak sei akontese ba ita nia moris. Ba ema barak, fiar katak, nia afeta loloos mak destrutivu.

Tradusaun husi fontes oioion. 

Foto husi getmore blog.

Hamosu Konsiensia Oinsa Uza Kareta Estadu!

Liuhosi observasaun durante loron Natal no Tinan Foun, haree katak iha Kareta Estadu nian barak tebes mak uza sala ba nesesidade privadu. Observasaun ne'e reforsa hosi posting Tempo Semanal nia pajina Facebook. Ho ida ne'e, tuir analiza pesoal, bele akontese tanba funsionariu lahatene bainhira mak bele uza Kareta Estadu no bele uza ba halo saida. Se sira hatene tiha ona, entaun presiza halo revolusaun ba mentalidade no mind-set. Hodi forma mentalidade foun no mind-set foun, katak sasan publiku bele uza de'it ba nesesidade publiku no iha tempu no oras determinadu tuir dekreitu lei sira. Nune'e bele salva Timor oan ne'ebe uza sasan publiku husi infernu, tanba sira halo hela sala maibe lasenti katak ida ne'e sala, sira naok hela maibe lahatene katak ida ne'e naok, halo hela korupsaun maibe sente-an moos hela. Ida ne'e mak perigu tebes ba nasaun nia futuru. So, revolusaun ba mentalidade tenke hahu iha inisiu 2015, no presiza tempu naruk atu hetan ema nia konsiensia. Konsiensia sei lamonu husi lalehan, lamosu husi siensia, konsiensia tenke sai husi ema idaidak nia laran.

Uza Kareta Estadu ba de'it nesesidade publiku, ne'e tulun poupa orsamentu estadu, lagasta kustu barak ba mina no manutensaun. Uza Kareta Estadu ho profesional katak uza tuir tempu no oras determinadu ba profisaun.
Ba rekreu iha tasi, la'os nesesidade publiku, tula oan ba eskola la'os servisu estadu nian, ba sosa modo iha merkadu, labele uza kareta governu, ba kompra pesoal nian iha plaza no supermerkadu seluk, la'os servisu estadu nian.
Se hadomi rai Timor, halo mudansa ba mentalidade no mind-set AGORA!

The Challenges of Jobs Market Competition in Timor-Leste

Since the independent, Timor-Leste has received a lot of assistance from international communities, whether it is fund, equipment and capacity building. The international agencies; UN agencies and international agencies have been working on capacity building of human resources for the development of the nation. Billions of dollars have been pouring to the development of human resources through the difference of schemes; however the human resource is still less developed.  At the international organization, the higher positions are occupied by international people and Timorese are at lower; assistant, associate, cleaner, security guards and gardener. People at lower positions were produced globally but lack of experience so the capability is not proved yet by the organization/ employment.

This situation also happens in the government organizations. Most of the high positions in the government are dominated by the people with international certification, with several acknowledgement of informal education, with proficiency in languages and skilled in computer programs. Those are categorized as skilled people as they are capable in technical skill, personal quality and widen connection. There is not much difficult for them to compete in labour market.

 According to the Timor-Leste national statistic, the number of people who are competing in job market is increased rapidly every year, in the same time the unemployment rate is also increased. Even the government through the Secretary of State for the Vocational Training and Employment has dispatched many Timorese youth to South Korea and Australia every year but it does not reduce unemployment rate significantly. Timorese workers in Australia and South Korea are located in lower position as unskilled workers. The wages will be sent to the country; however they are no capable enough to be a manager when they return home, some case may happens but that is just relatively. It is clearly seen that the most company in Timor-Leste are managed by foreigners and Timorese are office staff with minor responsibility.

The job creation by Timorese people is still fewer compare to the foreigners in Timor-Leste, even just selling snacks in the streets, mostly occupied by foreigners; Indian, Indonesia, Vietnamese and other less development countries in ASIAN.

The major industrialization for job creation is in agriculture sector.  But unfortunately, local people still manage the agriculture production by traditional manners so the yield of the product is not well utilized. The mindset of the agriculture is “harvest for eating or yields for selling to get money”. That is it. Even the agriculture is the major industry in contribution to the job creation however people are not interested in because there is no supporting sector such as infrastructure, matchmaking market, and distribution of product after harvesting. People are mostly compete in officer affairs such as administration & finance, IT, engineering, education and training, secretary, accounting, and other positions related in offices. For these places, people is required to have enough skills and others abilities with trusted certificates in order to be selected by the employments.

Various efforts have been running by organizations and companies to build up the skills in order to have opportunity for self-employed but is still not appeared yet. The job creations by the public and private institutions are not sufficient to accommodate many people.  Higher education, skills and some other competencies are essential to master enough in order to compete in the labour markets.

By Octa S. de C.

Email: ocsulcar@yahoo.com

END

Saude, Fasilidade, no Atendimentu Publiku

Inkontru loron ba loron, informasaun wain haklekar iha oin, dala-wain hau tuur hakmatek hodi rona deit, dala-ruma hau laaguenta atu hato'o opiniaun balun, dala-barak hau hekerek deit iha diariu moris nian.

 

Ohin, inkontru kona-ba saude nian, fasilidade sira saude nian atu responde ba nesisidade funsionariu sira nian. Doutor nain rua husi rai liur, halo visita mai Timor, atu hare ho matan fasilidade mediku nian no mos rekursu iha area saude nian. Interesante.

 

Tinan 13 liu ona, Timor moris iha ambiente ukun rasik-an, esforsu barak halo ona iha area hotu-hotu hodi dezenvolve rai independenti ida ne'e. Iha area saude nian, bele dehan katak esforsu maka'as tebes, hahu kedas tinan balun deit, hetan ona akordu ho nasaun Kuba, haruka estudante rihun ba estuda kona-ba mediku nian atu iha futuru bele fo serbisu diak halo tratamentu ba ema moras sira iha Timor. Nune'es esforsu sidadaun joventude barak ne'ebe dedika sira nia-an estuda iha area saude nian iha nasaun barak, bele temi Fiji, Australia, Indonesia, no seluk tan.

 

Prosesu la'o nafatin ba oin, rekursu umanu komesa naton ona, ekipamentu no fasilidade sira to'o ka lato'o, naton dadaun ona. Maibe ejizensia aas ba bebeik, nesisidade iha area saude maka'as tebe-tebes, ema hotu-hotu persija atendementu, ema ida-idak hakarak moris saudavel. Tanba ne'e, persija nafatin esforsu, laos ona haruka estudante ba estuda maibe oin nusa atu halo jestor ida diak, briliante hodi jere rekursu umanu ne'ebe naton ona ne'e ho fasilidade sira ne'ebe iha dadauk. Ita persija urjente treinamnetu balun ne'ebe liga ba Etika Baziku, atu atende ema ho oin midar, ho lian mamar, ho hahalok benvindu, no fo hakmatek no dame ba ema moras sira.

 

Hafoin halo tiha visita iha Klinika barak no Hospital Nasional, rezultadu mak dehan katak Timor-Leste bele ona tama kategoria fo tratamentu saude level un katak iha ona kapasidade atu salva ema nia moris iha emerjensia no oferese tratamentu saude baziku, maibe seidauk bele kura ema to'o diak lolos, katak fo tiha salvasaun ba ema nia moris no fo tratamentu saude baziku, tenke haruka ema ne'e ba rai seluk atu kura nia moras to'o diak, rekopera fila fali, halakon tiha moras ne'e.

 

Iha mos komentariu no esperensia balun husi ema barak kona-ba atendementu iha sala emerjensia Hospital Nasional ninian bazea ba faktu sira; katak bainhira lori ema ba sala emerjensia no ema ne'e iha kondisaun kritiku atu mate ona maibe funsionariu sira haruka atu forma tuir lina, katak se mak mai uluk sei hetan tratamentu uluk, prinsipiu ida ne'e lavalidu iha situasaun emerjensia. Iha mos balun dehan; fatin laiha ona, katak sala emerjensia nakonu ona, entaun kala ema ne'e labele hetan atendementu emerjensia. Iha mos dehan tan katak; doutor la iha, ne'e hatudu katak sala emerjensia lafunsiona 24 horas. Aat liu ka hau tauk loron Sabado ho Domingu sala emerjensia taka tanba ferias, entaun se ita lori ema moras ba sala emerjensia iha loron Sabado, sei hatan mai fali iha loron Segunda hehe...

 

Espera, ita sei bele hadiak ita nia sistema atendimentu saude nian iha nasaun ida ne'e ho ita nia rekursu umanu ne'ebe barak dadaun ona, no mos fasilidade no ekipamentu sira ne'ebe iha. Fo nafatin suporta ba maluk Timor oan sira ne'ebe dedika sira nia moris atu servi iha area saude, no hein katak sira hotu hala'o sira nia funsaun ho profesionalidade.

In Memoriam Joana dos Santos, 1993 - 11 Outubru - 2013





Buat hotu akontese tuir Na'i nia hakarak. Maromak mak moris nia abut no domin nia hun. Ema nia moris soi iha Maromak nia mahon. Nia mak hu'u iss no haraik espiritu ba ema idaidak.



Auina Joana (foto: Jano)

Joana dos Santos, inan diak ida ba oan mane nain hitu. Inan ida nakonu ho domin ba nia oan sira. Inan ida terus nain tanba nia oan sira. Inan ida nakonu ho espiritu no dedikadu ba futuru oan sira nian. Inan ida la hatene kolen hasoru loron manas, udan boot, rai maran no mota boot tanba deit domin boot ba nia oan sira.  



Ida ne'e mak Joana dos Santos, feto faluk ida, ne'ebe serbisu maka'as, hikis kosar-ben hodi fo han no hatais, fo eskola no hanorin nia oan mane nain hitu. Joao Martins, nia laen barlaqueadu, mate hela nia ho oan hitu iha tinan 1980 liu ba. Tinan sanulu resin tolu moris hanesan faluk ho difikuldade no susar oi-oin, maibe ho domin boot konsege ultrapasa prolema barak no loke dalan ba nia oan sira, dudu nia oan sira ba mundu edukasaun no prepara hela sira nia futuru.

Nu'udar inan ida, Joana halo duni nia obrigasaun maske situasaun moris no kondisaun ekonomia iha tempu ne'eba iha faze kritiku. Moris iha foho, ai-sunu no bee-moos dook, ai-han sira depende ba rezultadu husi kintal no to'os. Hanesan feto, tenki halo serbisu feto nian, maibe iha tempu hanesan tenki halo mos serbisu mane nian. Hau imajina la hetan, la hatene nia hetan forsa husi ne'ebe maibe hau hatene deit katak ho domin mos no dedikasaun ba oan sira mak forsa boot ba nia hodi ultrapasa difikuldade sira ne'ebe boot no imposible atu hetan solusaun.

Hau nia tempu hamutuk ho inan doben durante tinan sanulu resin haat, maibe hau nia domin hela ba rohan laek, metin nafatin iha hau fuan  hanesan mos domin ne'ebe hau simu husi nia. Hau sei lembra memoria barak ne'ebe furak, midar no mos moruk durante tempu ida ne'e. Hanoin iha to'os laran; kuda rai, hamoos batar duut, silu batar, lalin batar, ku'u modo, ke'e forerai. Iha kintal uma nian; sei lembra nia badinas kuda fehuk midar, ai-farina, hamoos du'ut iha kintal, ku'u malus no buat seluk tan. Iha natar; sei lembra hamoos duut iha natar laran, hein no duni manu-lin, koa hare, sama hare, tula hare iha trator boot, halo rituais sira iha natar laran nian, tempu ruma mos ke'e maek iha ai kakeu laran, ku'u ai-manas, nune'e mos tempu seluk ba kaer boek, kaer ikan, tuna no buat seluk tan. Dala ruma mos hau hanoin hetan ba faan manu iha merkadu, faan fahi ka bibi oan rumu. Tempu seluk hanoin hetan fo han fahi, kesi bibi, sulan karau, tula manu ba ai sira. Dala ruma mos hau hanoin nia tuku batar, fai batar ka hare, daan batar ka tein etu kahur ho batar tukun, tunu batar nurak iha toos laran. Loron ida, baihira nia fila husi toos lori batar bote boot rua no hau sei sa'e tan ba bote ida nia laran.

Auama Joao (foto: Jano)

Memoria hakerek lahotu maibe hela metin iha diariu moris nian. Iha tempu balun, hau hanoin kona halo viajen hamutuk, ba buka koto-moruk iha ai-laran, ku'u goiabas tasak no ai-fuan sira seluk, ke'e kumbili, sinkumas iha fatin-fatin foho leten nian. Nune'e mos hanoi hikas hakur mota, sa'e foho lolon, liu husi duut matak, husi ne'e hau aprende buat barak kona-ba moris nia lalaok, nia hanorin ho asaun iha aktividade moris loron-loron.

Tinan rua nulu (20 anos) liu ona, nia mate tiha ona, maibe memoria hirak ne'e hela metin ba istoria moris nian, kesi metin iha domin entre inan ho oan, no mate sei lahakotu domin ne'e. Joana dos Santos, hatene lolos saida mak domin, tanba ne'e nia hadomi nia oan sira ho domin lolos nian, domin ida ne'ebe nia hun iha Kristu, domin Maromak nian.

1993 - 11 Outubru - 2013, Auina nia loron mate, isin mak mate, klamar sei moris nafatin no domin sei buras nafatin. Ami, oan sira nia orasaun, hanoin no domin sei hamutuk nafatin ho auina, inan ne'ebe ami hadomi. Ami fiar katak iha mundu seluk ne'eba, auina sei hetan fatin diak, naroman no dame hamutuk ho Anjo no Santo sira ba rohan laek.

Dili, 11 Outubru 2013