Ó Firaku, Ha’u Kaladi

Hakerek hosi : Xisto Viana - Estuda iha Faculdade de Letras-Universidade do Porto-Portugal

 Hanorin-na’in iha Universidade Timor Lorosa’e - Porto, 13 de Agosto de 2011

Horiuluk bei’ala sira otas

Husik hela lia-menon ba ita bei-oan

Imi temi firaku ka maluk kaladi

Hodi hadomi malu liután

Firaku no kaladi, ne’e lia-murak

Nu’udar lia-abut lisan rai ne’e

Ó temi sorin-balun, ha’u temi sorin-seluk

Ita rua maun-alin ka’ut ida de’it

Tansá loron ohin sai lia-hakribit

Lia-murak nakseluk sai lia-moruk

Uluk lia-midar, liafuan be morin

Nakfilak sai lulik labele temi tan

Mane maluk, feto maluk rai ne’e nian

Nu’udar bei-oan keta laran-aat

Hakiak filahikas tempu liun sira

Hateke ba oin haluhan buat liun

Lalika laran-moras ba ó sorin rasik

Nafatin bolu malu hodi laran maus

Bolu ha’u firaku,mós firaku

Bolu ha’u kaladi,ómós kaladi

Ne’e katak, sá katak, la leet ida

Ita abut, rai-abut sai moris-abut

Lalika haketak, fafutuk ida-ne’e

Labele hakiak fafahek ida-ne’e

Temi kaladi, eh temi firaku

Temi firaku, eh temi kaladi

Laiha saseluk, laiha hun seluk

Hun ida de’it, abut ida de’it

Temi hela banafatin, bolu maun-alin

Temi leet banafatin, hasé biin-alin

Sira rua oin ketak lakatak fuik leet

Hun ida, abut ida mesak ida de’it

Kaer metin ukun-fuan, bei’ala sira fó

Lolo liman ba malu, tane malu bá

Sara malu, libur malu hakuak malu bá

Hafoun loron foun, iha moris foun