Francisco Maia in Memory - Maun Sico nia Ain Fatin

Francisco Maia (Sico)

Bainhira ema ida hakotu nia iis la signifika moris too ona nia rohan. Mate katak husik hela mundu ida hodi hakat ba mundu seluk. Ema ida-idak sei hakotu nia iis maibe ho tempu no fatin ne'ebe la hanesan. La iha ema ida hatene bainhira nia hakotu iis. Ita ema la soi atu hases-an bainhira loron ne'e monu ba ita nia moris. 

Francisco Maia ho naran istima Sico, oan mane numeru haat husi maun-alin nain hitu. Moris iha rai Lolocolo, Suco Atabae iha tinan tolu nulu resin liu ba. Hafoin marka hela istoria lubuk ida iha nia vida moris, nia husik hela mundu ida ne'e loron sanulu resin lima fula dezembru tinan rua nulu sanulu resin ida iha Hospital Nasional Guido Valadares. 

Francisco matenek koalia lian Tokodede no Mambae hanesan lian segundu, lian Kemak hanesan lian inan nian. Hanesan Timor oan, nia koalia Tetun diak los, bele mos koalia lian Indonesia no Ingles uitoan. Nia pasa tempu lubuk iha baliza entre ema Tokodede iha rai Lisadila, Maubara no ema Mambae iha rai Sare, Hatulia. Hakat liu tempu joven nian iha rai Same, Manufahi. Nia halo kolega ho ema barak oi-oin deit, koalia ho oin midar no hamanasa ba ema hotu. 

Durante nia vida moris, Sico hasoru esperensia oin-oin henasan oan ki'ak. Nia ho idade eskola primaria nian bele ona fila natar, kuda hare, hamos du'ut iha natar, ko'a hare, sama hare, iha tempu hanesan nia halo toos, harii lutu, kuda batar, iha tempu seluk nia mos krau atan diak ida, harii krau luhan, hakiak krau, fahi, bibi no manu. Maibe mos nia la haluha tempu ba eskola. Fila husi eskola, hala'o nafatin rutinidade sira ne'e. Ho kondisaun minimu tebes, nia kosege remata Eskola Primaria iha Sare. 

Francisco kontinua nia estudu Pre-Secundaria no Secundaria iha rai Same, Manufahi. Nia toman ona hela mesak, dook husi inan no maun alin sira iha rai Atabae. Husi Same, Francisco kontinua nia estudu iha rai lulik Taci Tolu, Sekolah Tinggi Ilmu Ekonomi ka STIE, maibe tanba funu 1999 tama dadauk, universidade taka, ema ida-idak halai namkari, nia la konsege remata estudu ida ne'e. Nia mos hases-an husi rai Timor ba hela iha rai Sulawesi besik tinan no muda fali ba rai Surabaya, hafoin tinan 2001, fila hikas ba rai doben Timor. 

Hanesan estudante, Francisco involve-an maka'as iha rede klandestina, funu ba libertasaun nasional. Dala barak nia hasoru risku oi-oin hala'o aktividade estafeta, obriga-an hato'o hela karta ruma ba 'ai-laran' no mos karta resposta husi 'ai laran' ba cidade. Francisco nia involvimentu iha funu libertasaun nasional la hakerek iha  istoria, la buka deklaran ba komisaun ida no la hein estadu atu kondekora. Nia la sura saida mak nia fo ba nasaun no la hein ka la husu buat ruma husi nasaun. 

Tempu agora, Timor oan barak deklara-an mesak funu nain, monta istoria mesak furak no  kmanek atu hetan kondekorasaun husi estadu. Ita agradese ba Timor oan sira ne'ebe fo-an duni ba funu libertasaun maibe mos la kestiona sira ne'ebe hakarak manipula istoria atu hetan rekuinesementu. 

Francisco nein hanoin atu hetan rekuinesementu ba nia involvimentu, nia hili vida hanesan taxista durante tinan barak, maibe nunka atu hetan moris suksesu. Ho ida ne'e, nia esforsu-an atu sai ba buka moris iha ema nia rain. Iha tinan 2008, Francisco husik hela rai Timor ba buka moris iha rai Irlandia. 

Serbisu iha ema nia rain, ho kondisaun klimatika malirin, situasaun enviromentu diferente ho rai Timor, kontribui maka'as ba problema saude no psikologia. Francisco hetan moras iha ema nia rain. Nia esforsu-an maka'as ho energia postivu atu rekopera nia saude, maibe moras kontinua aumenta loron ba loron. 

Loron rua nulu fulan maiu tinan rua nulu sanulu resin ida, Francisco desidi fila ba rai Timor. Iha familia nia le'et, esforsu oi-oin hala'o atu salva nia moris, maibe vida moris no mate laos ita ema mak kaer. Tanba ne'e, iha situasaun kalma no domin nia laran Francisco hakotu nia iis iha hospital nasional iha loron sanulu resin lima fulan dezembru tinan rua nulu sanulu resin ida. Franciso husik hela nia sposa no oan nain tolu ne'ebe sei ki'ik.

Boa viagem maun Sico, Deskansa ho Dame, Rest in Peace. 

Africa Leste, Janeiru 2012. 
Komemora maun Sico nia mate ba loron  haat nulu (40), 
15 Dezembru 2011 - 24 Janeiru 2012.