May 30, 2011

Puisia Timor ho Lian Tetun

Liurai Diuk - Delek 

Husi: Hugo Fernandes


Kalan-loron asu hatenu
Ema fa’an ibun-fa’an lian
Mean – matak koris nadelek
Asu hatenu lian la’ek

Liurai metan-liu rai asu maten
Liurai mutin-liurai asu maten
Mean-matak koris hakdiuk
Asu hatenu lian matek


Rai fohon-rai tasi
Ema fa’an lia-fa’an knanoik
Manu tasi semo as-tatoli lia
Asu hatenu kalan-loron
Liurai diuk-delek


nota: Ne'e Poesia ba krise Timor 2006
Hugo F/Renon/2007



Tansa Timor 

Husi: Josh Trindade


O nia naha todan seidauk Kaman…
O nia matan-ben seidauk maran…
O nia ema sei terus no halai namkari…
Oho malu…
Trata malu….
Sunu malu…
Hamoe malu…
Nauk malu…
Duni malu…
Baku malu…
La fiar malu…
La respeitu malu?

Tansa Timor?
O nia nasaun ne’e,
hanesan nasaun fuik ida laos ba Timor oan….
O nia bandeira ne’e,
hanesan hena bai-bain ida….
O nia Konstituisaun ne’e,
hanesan surat tahan deit…
O nia unidade ne’e,
Hanesan lia falsu ida iha o nia ibun tutun…
O nia povu ne’e,
Hanesan oan kiak ida laiha inan aman…
O nia nai ulun ne’e,
hanesan lanu ten ida nebe hemu tua sabu to’o lahatene aan…

Tansa Timor?
O nia demokrasia ne’e,
hanesan kroat ida hodi oho malu…
O nia direitus humanus ne’e,
hanesan lia kroat ida hodi la respeitu malu…

Tansa Timor?
Malisan ruma babeur ona O?
Maromak mak kastigu ona O?
Ka, O mak beik hanesan kuda?

Tansa Timor……….



Lafahek Oan 
Husi: Vito Simoes Martins


Se o bele horon hau is, is ne morin kafe nian

Se o bele hare hau matan, matan ne loron matan loron atu sae nian

Se o senti hau kosar, kosar ne mina timor nian

Se o horon hau fuk, fuk ne morin ai kameli nian.

Se o hakarak fera hau isin hare hau ran, ran ne lafahek nian.

Se o lafiar, o bele fera o isin hare o ran, ran ne lafahek nian mos!

Hau, O, Nia, Sira, Ita hotu lafahek Timor nia oan!


1 comment:

Anonymous said...

Ahaa, itѕ fastiԁious convеrsаtion on the toріc of this аrticle at this plасe at this
wеblog, Ӏ have read all that, ѕo at thiѕ tіme me also commenting here.


my website: dfw seo specialists