Dadersan malirin, rai hun sei mutin, anin fresku dader hu'u hadulas halo isin fulun hamriik. Sai husi uma, dala ruma la matabisu, hakat ain lao tuir luron ida-idak nian, sai ba luron boot, hodi hakat to'o ba serbisu fatin. Sira la'o ain deit, maibe ho espiritu nakonu atu kontribui ba Cidade da Paz. Sira ne'e mak ita bai-bain bolu PASUKAN BIRU, ka maluk sira ne'ebe dedika-an ba hamos foer sira iha Dili laran.
Ema gosta soe foer arbiru iha fatin-fatin Cidade laran, no ema hateke matan sorin deit ba maluk sira ne'ebe dedika-an ba hamos foer. Foer sira ne'e nia iis ita la tahan, dois los. Maibe sira ho pasensia, dala barak la uza masker, raut ho liman no hamos didiak, tula ba kareta hodi ba soe iha Tibar. Ema seluk la'o ba mai, ho motor ka kareta halo rai rahun sa'e tan sira, maibe sira ho dedikasaun tomak, fokus ba sira nia serbisu, serbisu ba ema hotu nia diak, ba ema hotu nia saude, ba ema hotu nia gostu ba fatin moos, no ema hotu nia hakarak dezenvolvimentu diak ba Cidade da Paz, Dili.
Hau nia apresiasaun boot ba maluk sira, PASUKAN BIRU, imi mak heroi foun ba dezenvolvimentu nasional. Imi maka heroi foun ba Paz no Estabilidade, imi mak autor ba Cidade da Paz.
No comments:
Post a Comment