Eskola oan sira funu hasoru rai malirin iha dadersan nakukun, hasoru maho-wen no anin fresku sona borus kulit tama to'o ruin. Tauk kaer bee, malirin hanesan zelu, halo isin baruk maibe espiritu atu hetan matenek no hakarak moris diak iha futuru obriga eskola oan sira pre-para an iha dader no hakat ain ba eskola.
Ohin dader tuku 7 liu, estudante ensinu baziku (peimaria) nadodon iha dalan, mesak badak oan, ho uniforma mutin-metan, hakat dadauk ain ba eskola ho nakdedar, isin fulun hamriik, malirin los, sira nia liman kumu metin ba malu hanesan atu ba simu komuniaun iha igreja.
Hau nia imajinasaun ba situasaun ekonomia familiar iha Timor-Leste ne'ebe la fo dalan atu inan-aman sira fo hatais apropriadu ba labarik sira ne'e. Laos deit sira ne'ebe hau hare loro-loron iha hau nia dalan ba edifisiu maibe hau bele imajina katak kuaze labarik sira iha Timor laran tomak la iha kbiit atu hetan hatais diak no diferente tuir mudansa klima Timor nian. Kuitadu, labarik sira nia hatais mihis los no badak, husik sira nia isin nurak oan ne'e sona borus husi rai malirin, barak liu mak kaer deit kadernu iha liman tamba la iha pasta atu tau netik ba.
Hau hanoin iha Timor ne'e, iha deit familia lubuk oan ida mak iha ona kbiit atu fo sira nia oan nesesidade baziku eskola nian hanesan uniforma no ekipamentus sira seluk ne'ebe apropriadu. Maibe, husi grupu kiik ne'e sei bele fahe tan ba grupu kiik oan ida mak iha duni kbiit ho lolos nian, katak hetan duni husi kosar been, maibe ida seluk hetan husi dalan seluk ne'ebe lais liu, bele dehan korupsaun. Maibe iha ne'e hau la foka ba aktu korupsaun, maibe sentimentu humanidade ba labarik oan sira ne'ebe ho limitasaun hotu-hotu sei hakat nafatin ba eskola.
Tempu liu ba, iha Portugues nia ukun, los duni katak liurai no dato sira nia oan deit mak hetan oportunidade ba eskola, maibe iha mos difikuldade barak no limitasau oi-oin. Povu nia ona la iha liu oportunidade atu ba eskola. Tama mai Indonesia nia okupasaun ilegal, loke oportunidade ba ema hotu-hotu inklui povu nia oan hetan ona oportunidade ba eskola. Susar duni, terus tebes. Difikuldade barak demais iha tinan 1976 to'o ba tinan 1980-resin. Barak mak la ba eskola tanba funu maibe barak obriga-an ba eskola, ikus mai barak mak agora iha oportunidade dedika-an ba serbisu publiku iha governasaun sai funsionariu publiku.
Besik ona ba dekade haat husi Indoensia nia okupasaun ilegal, iha ona mudansa barak ba mundu edukasaun Timor-Leste nian, liu-liu iha tempu ukun rasik-an ida ne'e maibe buat ida susar no terus, limitasaun no difikuldade la ses-an hela husi Timor oan sira. Bainhira los mak labarik oan sira ne'e bele iha kondisaun apropriadu husi uma laran kedas (hatais, hahan, fasilidade) to'o ba iskola fatin (fatin diak, fasilidade kumpletu, kualidade eskolar).
Ita nia sistema edukasaun dezenvolve-an dadauk no nakdasak-an iha fatin, kualidade edukasaun husi ensinu baziku to'o ensinu superior bidu hela iha fatin. Halo nusa mak atu hetan kualidade diak, cek took orariu eskola iha eskola publiku sira, ezemplu semana ida aprende deit Ingles oras rua, Jeografika oras rua, Matematika oras rua no seluk-seluk tan mairia oras rua deit, depois sei aumenta tan mestri la tama ho no la ho razaun, loron feriadu nasional no eskola nian, aumenta tan ho difikuldade linguajen iha aprendizajen, aumenta tan mestri konta istoria tempu uluk nian mak barak, ne'ebe sura lolos semena ida iha deit minutu oan balun ba aprende siensia ida, hotu tiha la iha kontinuasaun istuda iha uma. Bainhira mak ita iha kulifikasaun edukasaun ida ne'ebe diak?
Husik ba alin oan sira nakdedar iha dadersan nakukun, funu nafatin ba oin iha mundu edukasaun nian, espera katak tempu oin mai sei iha mudansa radikal liu husi mega-projeitu edukasaun nian, nune'e mos planu estratejiku dezenvolvimentu nasional, ne'ebe bele iha kondisaun ekonomia iha familia sufisienti no mos iha qualidade diak iha eskola.
No comments:
Post a Comment