Dala barak hau hatete nune'e "fiar o nia maluk Timor-oan rasik" katak hau la fiar naok-ten ezisti iha rai Timor. Ema sira ne'ebe besik sempre fo hanoin katak ba ne'ebe deit no iha fatin publiku "keta haluha lori tutuir kapaseti, se lae ema naok", balun mos fo hanoin "kalan keta para motor ka rai hela sasan iha liur, se lae ema naok", maibe hau firmi katak fiar o nia maluk Timor-oan rasik, buat ida sei la lakon, tanba Timor oan ne'e ema diak ho dignidade aas.
Rezultadu mak ne'e, kapaseti diak nian rua lakon tiha ona, ida iha Mandarin, ida seluk iha Plaza Timor, no ikus liu ema tama moru laran iha kalan maski ahi naroman hanesan loron manas, konsege sobu motor halo aat, sorte diak hakfodak lalais, se lae mos lakon tiha ona. Konsekuensia hau nia "fiar" ne'e la loos, katak iha Timor mos ezisti ema aat, naok-ten.
Ho akontesimentu hirak ne'e, hau hanoin kona-ba korupsaun iha governasaun nia laran. Orsamentu kuaze biloins barak ona mak fakar ba rai Timor maibe dezenvolvimentu bidu iha fatin deit, laiha kualidade, lala'o ba oin. Timor oan barak kestiona kona-ba kualifikasaun membru governu nian, sistema administrasaun, estrutura governu ida bokur demais, seriedade implementasaun planu governu nian, to'o ikus ema hotu hatene katak korupsaun buras tebes iha governasaun nia laran. Ida ne'e hatudu katak ema naok-ten barak, iha duni no ezisti iha rai doben Timor-Leste.
Ema sai naok-ten tanba baruk-ten maibe hakarak riku lalais. Naok-ten mos iha nia klase rasik tuir ida-idak nia kapasidade. Sira ne'ebe la iskola ka iskola mos lahun-ladikin ikus mai sai naok-ten ida ne'ebe kiik no kiak, katak naok deit sasan sira ne'ebe la dun folin boot hanesan kapaseti, supermi falun oan ida, besi rohan oan ruma, ema nia animal oan sira. Maibe mos bainhira sira toman ona, bele hasa'e kapasidade ba naok motor, kareta no buat seluk neebe boot. Iha parte seluk, naok-ten sira iha governu ne'e mesak ema matenek boot, sira naok mos ho matenek no hetan numeru boot, bele dehan osan rihun ba rihun no buat seluk tan, ne'ebe ita hanaran korupsaun, mal administrasaun, la iha kualidade serbisu no seluk-seluk tan.
Ita moris hafuhu malu deit, naok-ten sira hafuhu hela ema nia sasan, halo planu no halo asaun. Ema sasan nain sira matan moris-neon nain ba nia sasan sira, halo defeza atu labele monu ba naok-ten nia liman. Hatudu katak moris la ho siguransa, ho laran tauk hela deit; tauk loron ruma ema kaer, baku tasak didiak no hatama ba kadia, nune'e mos sasan nain moris la hakmatek lahatene bainhira deit matan sala, sasan lakon.
Atu konklui, atu dehan deit nune'e; ema ida-idak iha nia sorte, ema ida-idak nain ba nia moris, maibe ema hotu-hotu nia sorte no moris sei la hanesan. Atu halo diak ka halo aat ne'e opsaun moris nian. Atu moris kiak ka moris riku, ida ne'e mos opsaun moris nian. Se mak hakarak moris diak no sai riku, nia sei obriga nia enerjia positivu tomak atu atinji nia mehi, to'o ikus hetan ksolok, kontente no dame iha moris. Se mak hakarak riku-matak, konserteza obriga nia enerjia negativa tomak atu atinji nia mehi no resultadu ikus moris la hakmatek no nunka iha dame iha moris tomak.
No comments:
Post a Comment