Animal sira sei husik livre iha Cidade Dili nia laran

Ema Timor matenek hakiak animal sira hanesan fahi, bibi, asu, manu, karau no seluk-seluk tan. Maibe dala ruma matenek demais liu to'o ba hakiak mos animal iha Cidade Dili no husik livre iha cidade laran.

 

Tempu liu ba, beiala sira nian, no maluk Timor oan barak ne'ebe agora moris iha foho no knua sira, hakiak animal ne'e sebisu diak tebes, se nian animal mak barak liu konsidera hanesan ema riku, no hetan fama diak iha komunidade nia leet. Katak ho animal sira ne'e sira bele halo buat oi-oin, no buat boot liu mak bele hakotu feto ida nia folin, ka bele hafolin feto. Loron ikus ne'e, maluk balun komesa ona hateke dook ba futuru, katak faan animal sira ne'e no selu oan ba eskola, balu mos fila-liman sosa no faan fali animal atu hetan funan no bele halo buat ruma ba-an no familia.

 

Istoria ne'e oin seluk ba maluk Timor oan barak ne'ebe hakiak animal iha Cidade Dili, iha orden ne'ebe hasai ona husi administrasaun Distrito Dili tinan hirak liu ba kotuk, atu tau ka hakiak animal iha nia fatin no labele husik arbiru iha cidade laran. Ezekusaun orden ne'e la'o manas-malirin hela, la hun la dikin, espiritu hakiak animal no husik livre boot liu orden governu lokal Dili nian. Tanba ne'e animal barak sei pasiar hadulas hela Dili laran.

 

Ohin dader, hau atu soke sala manu inan no oan barak iha area Farol nian, area ne'ebe Ministro/a barak hela ba no mos embaisada barak hatur an ba. Loron hirak liu ba no loron-loron asu barak tebes mak toba ka halai ba  mai hela iha estrada laran area Bebonuk, Farol, Bairro Pite, Rai Kotu, Bidau no seluk-seluk tan. Dala ruma mos sei hare hetan bibi halai hadulas iha estrada protokolu, han duut no ai ne'ebe foin kuda ba. Aat los.

 

Cidade Dili, Kapital nasaun Republika Demokratika de Timor-Leste. Odamatan boot Timor-Leste nian ba mundo tomak.  Ema rai liur barak mak hela iha Dili, no barak mak loro-loron tama mai. Timor oan barak no kuaze hotu-hotu hakarak Kapital Nasaun ida ne'ebe moos husi foer no livre husi animal sira. Se mak atu kontribui ba halo moos cidade Dili, no se mak iha konsiensia atu la hakiak animal iha cidade Dili, resposta mak Timor oan hotu-hotu.

 

Konsekuensia mak, Timor oan ida-idak ne'ebe hela no moris iha Dili labele soe foer arbiru, no diak liu no diak tebes lalika hakiak animal iha Dili laran tomak. Se ita halo ida ne'e, maizumenus hanesan ita nia sakrifisiu no kontribuisaun ba dezenvolvimentu Kapital Nasaun nian. Nia resultadu mak ita hotu moris iha moos nia laran, iha saude diak, no la iha animal atu halo foer no mos lakauza ba asidente trafiku.  

 

Ita persija tempu atu hetan konsiensia ema hotu nian, maibe pelumenus ita komesa ona ho ita nia-an atu habelar ba vijinu to'o ba komunidade no sisiedade tomak iha Dili laran. Bainhira tan? ita ukun-an tinan sanulu resin ona, hein tan bainhira? husu se mak atu halo uluk? Resposta mak ne'e, tenke komesa agora kedas no hahu husi ita nia-an.