HADOMI Ó DALEN TANE Ó RAIN

Hakerek husi:Xisto Viana - Porto-Portugal

Dalen rai-na’in ita hotu nian

Dalen be moris horiuluk kedas

Ó hatene oinsá kona-ba nian

Ó rasik hatene nia hun no rohan

Ó rasik ko’alia kona-ba ó dalen

La leet hatene sá loos ba nia horik

Ema seluk la hatene nia wee-matan

Tan ne’e labele foti lia kona nian

Ó loos, ko’alia biit hodi oin

Hodi hakiak ó dalen sai boot

Hametin no haburas ba loron oin

Hodi fó fuan ba ó lisan rai-na’in

Ó dalen hanesan ó moris-abut

Tan ne’e hatane nia nanin hodi oin

Karik ó husik nakfokit hodi biit

Ó lisan nia abut sei mout hodi biit

Keta husik ema seluk hamatan ó dalen

Lalika ema leet ko’alia temi nian

Tan sira la hatene sá loos ba nian

Tan ne’e hasala nia hun no dikin

Oinsá ema hatene nia wee-matan

Tansá sira temi kona nia horik

La katak hakarak nia fuan ruma

Ne’ebé fó fuan ba sira isin mesak

Hakarak ita emar sira be tuan

Hanoin mós tuan ba ita dalen

Hatene hakiak nia lian-musan

Hodi hafuan lia-loos ba ó dalen

Ita oan, ita emar sira sei wa’in

Hatene kle’an liu nia to’o abut

Sira rasik sei ke’e sira dalen-abut

Soi fuan hamoris ba nia makdalek

Horiuluk horiwa’in dalen mukit kedas

Lian- musan no fuan hosi raiseluk

Hanesan adubus haburas ita dalen

Lakatak soi fuan dalen raiseluk

Haktuir ukun-fuan reinu nia saseluk

Hakotu tiha ona iha uma-fukun

Keta hili hamout ó dalen rasik

Dalen rai-lulik rasik halulik

Ó dalen, ha’u dalen, ita hotu nia dalen

Nu’udar wee-matan timoroan nia lisan

Keta sala, neon-sala no haninin ó dalen

Ó lisan nia abut sai lakon namout

Ema seluk raiseluk hafutar ó dalen

Sira liafuan fó fuan ba ó dalen

Haktuir raiseluk lian riku nanis

Halo tuir sira dalan ita dalen sai buras

Lalika foti lia hodi husu lia

Naran katak fó biban ita emar sira

Hodi bali no haburas ita dalen rasik

Hakle’an ita domin hodi tane ita lisan

Bei’ala sira soin rai hela ba ita

Otas-foun neon-na’in hamatan bá

Ó dalen rikusoin rai-na’in nian

Hadomi Ó Dalen Tane Ó Rain