FRETILIN favor ba osan ba Partidu, kontra Osan ba povo Maubere iha votasaun OJE211 Final Global

Dili. Forum Haksesuk (FH). Iha votasaun OJE2011 Final Global aprovado ho votasaun favor husi AMP, PUN, kontra husi partidu FRETILIN. OJE2011 aprovado ho Favor (42), Kontra (21) no Abstensaun (1). Total Osan ba OJE2011 tau hamutuk proposta husi Governu US$934,740,000.00 no Parlamentu Nasional (PN) hasae ho montante US$ 321,000.000.00.

Iha OJE2011 hamosu tan Fundus Infra-Estruturas (FIE) no Fundus Desenvolvimentu Kapital Humanu (FDKH), atu nune’e koncentrasaun ba Kapital Desenvolvimentu (KD) tama iha FIE. Atu kontrola diak obras, harii Ajencia Desenvolvimentu Nasional (ADN).

Cornelio Gama "L7" husi partidu UNDERTIM iha nia intervensaun ho convicto defende viabilizasaun ba OJE2011, tamba nia dehan katak ”vota favor tamba hakarak lori progresso no desenvolvimentu” ba rai Timor Leste.

Natalino dos Santos (CNRT) mos dehan hanesan; ”OJE2011 importante ba povo aileba iha distritus no sub-distritus, sei beneficiu ho programa halo uma ba povo kbiit laek sira”.

Teresa Amaral husi bankada ASDT hare ho konstrutivu ba OJE ne'e. Nia hare katak, ”Governu ida ne’e halo buat balun no balun seidauk". Tamba ne'e mak Teresa Amaral dehan, "vota favor atu halao buat balun nebe seidauk halo”.

Husi fatin PD nian, Teresa Pereira, hare liu ba necessidade povo nian. Pereira dehan fo nia votu a favor ho razaun, ”vota favor tamba ho konsciencia rasik, ho OJE2011 bele resolve problema ne’ebe maka povo infrenta”.

Riak Leman husi PSD iha nia parte defende katak ”Governu ida ne’e ukun rai ida ne’e to’o ramate, hodi resolve problema povo infrenta”.

Partidu FRETILIN, hakneak ba CNRT hodi asina proposta 84 hodi husu osan tan ba Partidus Politikus (PP), maibe osan ne’ebe ba povo tomak nia moris, povo Maubere no Aileba sira, FRETILIN rasik vota kontra. Se OJE2011 la passa, osan ba partidus mos la iha, la iha osan ba veteranus, la iha osan ba vitima violencia domestika no lakohi ahi lakan ba povo Maubere/Aileba sira.

Ba Adriano do Nascimento, presidente bankada PD konsiente katak nia iha obrigasaun no dever moral atu vota favor ba OJE2011 ne'e. ”Hau vota favor tamba iha moral no moralista ba ukun nain sira. Vota favor tamba, lakohi osan ba partidu politikus sira, sira hakarak osan bot ba partidu maibe kontra fali OJE2011 Final Global, ne’ebe halo diak ba povo Maubere/Aileba sira”, dehan Adriano nebe akuza iha tempu hanesan partidu sira nebe so hakarak osan deit.

PM Kay Rala Xanana Gusmao reconhece diferensas maibe hahi'i progresso no maturidade politika politikus-nai sira. ”Nudar politika, ita tenke rekonece katak ita lao diak, kompara ho rai seluk, hanesan Tunisia, rai seluk tan. Hau fiar katak ita nia povo tenke orgulho ka bangga ho ita. Maske iha diferensa, iha AMP ami rasik iha diferensa, maibe ita lao diak”, dehan PM ho emosaun.

Presidente PN, Lasama, iha sesaun ida ne'e expressa nia sentimento de urgulho nudar timor oan nomos hanesan dirigente Uma Fukun nian. ”Hau orgulho mos nudar deputado no diriji Uma Fukun ida ne’e, kooperasaun institucional. Orgulho mos tamba OJE2011. OJE2011 ne’e Timor oan mak halo no elabora, hatudu ona Timorizasaun, ita iha kbiit hodi halo OJE2011, ita iha kbiit hodi Ukun Rasik An”, dalen Lasama iha nia intervensaun.

http://www.forum-haksesuk.blogspot.com/